"ERREALITATEA NEURTZEN: FISIKA ETA MEKANIKA SENTSOREEN ETA SIMULAZIOEN BIDEZ"

 

STEAM proiektu honen helburua izan da ikasleek fenomeno fisikoak eta mekanikoak esperimentalki eta digitalki aztertzea, sentsore bidezko datu-bilketa eta simulazio interaktiboak erabiliz. Esperimentazioaren eta analisi digitalen bidez, ikasleek fisikako kontzeptu abstraktuak esperientzia errealen bidez barneratu dituzte, hala nola mugimendua, indarra, azelerazioa edo energia.

Ikasleek datu errealak bildu dituzte sentsoreekin (adibidez: azelerometroak, abiadura-neurgailuak, presio- edo tenperatura-sentsoreak) eta gero simulazio digitalekin alderatu dituzte emaitzak, horrela eredu teorikoak eta errealitatea konparatuz. Jarduera hauen bitartez, ikasleek pentsamendu konputazionala eta zientzia-gaitasunak garatuko dituzte, datuen tratamendua, programazio sinplea eta modelizazioa landuz.

 

Zientziatik errealitatera: neutroien mundua ezagutzen

 

2.Batxilergoko ikasleek STEAM SAREko "Energia berrikuntzan bihurtuz: ulertu nola funtzionatzen duen partikula-azeleragailu batean oinarritutako neutroi-iturri batek" izeneko jardueran parte hartu zuten martxoaren 6an.

Esperientzia paregabea izan dute, ikasgelako ikaskuntza eta benetako ingurune zientifikoa uztartuz. Jardueraren baitan, ESS Bilbao-ra bisita gidatua egin genuen, eta bertan ikasleek aukera izan zuten lehen eskutik ezagutzeko nola funtzionatzen duen partikula-azeleragailu batean oinarritutako neutroi-iturri batek.

Bisitan zehar, prozesuaren fase nagusiak aztertu genituen, baita teknologia honek hainbat sektoretan dituen aplikazioak ere, hala nola zientzian, industrian eta medikuntzan. Gainera, fisikan, ingeniaritzan eta teknologian adituak diren profesionalek azalpenak eman zizkiguten, ikasleen jakin-mina piztuz eta etorkizuneko aukera akademiko eta profesionaletara hurbilduz.

 

                                                           

Esperientzia osatzeko, ikasleek mekanikako klasean landutako proiektuari ekin zioten: partikula-azeleragailu batean oinarritutako neutroi-iturri baten prototipoa diseinatu eta eraikitzea. Lan hau modu analogikoan garatu dute, eta, horren bidez, talde-lana, sormena eta pentsamendu kritikoa sustatu dituzte.

Proiektuaren emaitzak bideoetan jaso dira; bertan ikus daitezke ikasleek sortutako prototipoak eta egindako lana. Horrela, ikasitakoa praktikan aplikatzeko aukera izan dute, eta zientzia eta teknologiaren mundura hurbiltzeko esperientzia aberasgarria bizi dute.  

Hona hemen prototipo baten adibide bat

 

 

 

STEAM SAREA-Grabitatzen duten gorputzak: artea eta zientzia elkarlanean

 

Gaur, otsailak 27, 2. Batxilergoko Fisikako ikasleek esperientzia berezi bat bizi izan dute: “Grabitatzen duten gorputzak: nola integratu artea eta zientzia” jarduera, Donostia International Physics Center-en (DIPC) eskutik.

Saioan zehar, artea eta sormena erabiliz, grabitazioarekin lotutako kontzeptuak landu dituzte modu dinamiko eta parte-hartzailean. DIPCeko aditu batzuek proposatutako talde-dinamika sortzaile eta performatiboen bidez, fisika beste modu batean bizitzeko eta ulertzeko aukera izan dute.

Gainera, DIPCeko zientzialariekin lasai hitz egiteko eta buruan zituzten galderak zuzenean egiteko aukera ere izan dute. Oso interesgarria izan da ikustea nola lan egiten duten benetako ikertzaileek, nolakoa den haien egunerokoa, eta nola iritsi diren gaur egun dauden tokira. Elkarrizketa horiei esker, grabitazioari buruz gehiago ikasi dute, baina baita zientzialari izateko bideari buruz ere. Benetan esperientzia aberasgarria izan da!

 

---

Emakume eta Neska Zientzialarien eguna - 2026

 

World Kafe: Neska eta Emakume Zientzialarien Nazioarteko Egunean,   bederatzi emakume zientzialari etorri dira ikastetxera, DBH4 eta Batxilergoko ikasleekin beren bizipenak partekatuz, zientziara gerturatu eta beren  ikasketa ibilbidea  irudikatzen laguntzeko ere. Ikasleek haien ibilbide profesionala, pasioa eta aholkuak gertutik ezagutzeko aukera paregabea izan dute,

Ikasleek animatzeko ondoko bideoa ikastetxeko web orrialdean argitaratu genuen .

 

Ekitaldiaren bideoa ikusi nahi badezu ireki ondoko QRa

 

 

 DBH2 eta DBH3ko ikasleek egun hori ospatzeko SCAPE ROOM bat egin zuten:

 

 

 

 

 

STEAM proiektua 24-25 - Zubiak eraiki eta frogatu!

 Zubiak eraiki eta frogatu!

Azken asteotan gure ikasleek proiektu berezi batean parte hartu dute: taldeka zubi bat diseinatu eta eraikitzea, eta gero zubi horien erresistentzia neurtzea benetako proba baten bidez. Helburua zen zein zubi zen sendoena jakitea, material berdinekin eginda eta diseinu desberdinak erabilita.

Proiektua honela egituratu da:

• Diseinua eta planifikazioa: Ikasleek euren ideiak marraztu eta egitura egonkor eta eraginkorren ezaugarriak aztertu dituzte.

• Eraikuntza: Euren diseinuak gauzatu dituzte, taldean lan eginez eta sormena erabiliz.

• Esfortzu-probak: Zubi bakoitzari pisua gehitu zaio progresiboki, apurtu arte, zubi sendoena zein den jakiteko.

Esperientzia honek aukera eman die ikasleei ingeniaritzako oinarrizko kontzeptuak esperimentalki ikasteko, hala nola tentsioa, konpresioa edo egitura oreka. Baina teknikoaz haratago, ikasleek talde-lana, erabakiak hartzea eta erronkei aurre egitea ere landu dituzte.

Parte hartu dute: DBH 4. mailako ikasleek

 Zer gertatzen da ikasle talde bati zubi bat diseinatu eta eraikitzeko erronka ematen badiezu? Eta gero pisua jasateko proba bat gehitzen baduzu? Hauxe: esperientzia aberasgarria eta emaitza harrigarriak!

Ikasleek beraien zubiak eraiki dituzte eta erresistentzia proba zorrotzak egin dituzte! Zein taldeak lortu du zubi sendoena?  

 

 Zorionak guztioi parte hartzeagatik!

 

 

 

 

 

 

 

STEAM proiektua 24-25 - Energia berriztagarrien esperimentuak eta etorkizuneko hiriaren maketa

"ETORKIZUNEKO HIRIA ERAIKITZEN:  ENERGETIKOKI ERAGINKORRA DEN HIRIAREN DISEINUA ETA ERAIKUNTZA "

Steam proiektuaren helburuak

❏ Jasangarritasunaren eta energiaren kontsumoaren garrantziari buruzko kontzientzia sustatzea.

❏Emakumeek zientzia eta teknologiaren arloko lanetarako grina eta lidergoa sustatzea.

❏Talde-lana, arazoen ebazpena eta sormena sustatzea.

❏ Proiektuak dokumentatzen ikastea hainbat IKT baliabide erabiliz.

❏ Zientzia eta ingeniaritza arloko emakumeren lana ezagutzea, erreferente femeninoak izan ditzaten.

❏ Teknologia berriak (simulazioak, sentsoreak, VR eta AR) barne hartzen dituzten metodologiak , proiektuetan oinarritutako metodologiak eta abar aplikazioan aurrera egitea.

 

Proiektuaren azalpen laburra eta antolaketa .

DBH4 mailan Fisika eta Kimika ikasgaia egiten duten ikasleekin burutu da, Euskara, Plastika eta Ekonomiako mintegiekin lankidetzan.

Etorkizuneko hiria eraikitzeko  lau maketa  egin dute Lanbide Jarduerak  ikasgaia egiten duten ikasleek eta bertan kokatzeko hainbat eraikuntzak diseinatu behar izan dituzte  energia berriztagarriak ezarriz: eguzki-energia fotovoltaikoa, eguzki-energia termikoa, energia eolikoa, eta hidrogenozko erregai-pila 

Ikasleek  Ekonomia ikasgaian ere eragin ekonomikoa aztertu dute , hain zuzen ere, energetikoki eraginkorrak diren etxeen eraikuntza epe luzerako errentagarria izan daitekeela frogatzean, energia-kostuak aurrezten baititu.

Talde-lana antolatzeko ikaskuntza kooperatibo moduan lan egin dute. Taldekide bakoitzak rol bat bete du (koordinatzailea, ikuskatzailea, bozeramailea eta idazkaria) eta horrek funtzio batzuk bere gain hartzea dakar, Talde bakoitzak bere ikaskideei aurkezpena edo infografia  erakutsi die  egin dituzten esperimentuak azalduz.

                                                            

HIDROGENOZKO PILA                  ENERGIA EOLIKOA 

            

ENERGIA FOTOVOLTAIKOA 

HIDROGENOZKO ERREGAI PILA